Op 6 november 1978 is joekskapel Mazes Mina opgerich. Inkele bevrujnde stelle volligde de trend in dae tied en auch Beesel had ein joekskapel. In Baolder woord 'n partie instrumente gekog en oetgestald in de hoeskamer van Drees en Jes Ottenheim aan de ringoaven bie St. Joris. Om beurte woord geprobeerd geluid oet dees instrumente te kriegen en nao enig gesjoemel en geruul kon de iërste repetitie geplend weare. Albert Simons waas intusse aangetrokke as dirigent en hae zou os weag wies make op de instrumente. In de blokhut van Jong Nederland woord de iërste theorieles gegaeve, mèr de instrumente jeukte in de henj, want d'r moest geluid gemaak waere. Na ein oer alleen mèr theorie waar 't eindelik zowiet: do-re-mi-sol, lang leve de lol.

Vader Jakob waas 't iërste nummer nao veer weake oefene, mèr d'r waas nog gèn naam veur de kapèl gevonje. Toen op ein repetitie geoefend woord op sjpele en tegeliekertied loupe, reep Albert Simons: “Mazes Mina dit guüf  ’t neet” en de naam van de joekskapel waas gebaore!

In de optocht van 1979 woord de geboarte van de joekskapèl en de naam officieel bekend gemaak. Mazes Mina kreeg al sjnel ein vaste plaats in 't carnavalsgebeuren, maar auch doaboeten in 't dörpsgebeure.

Volleybaltoernooien, voetbaltoernooien, euveral ware ze aanwezig. Zelf organiseerde Mazes Mina diverse joekskapellentreffe in de Drakebôch die altied erg druk bezoch woorte.

Het iërste jubeleum woord in 1983 gevierd same mit de Vriebuuters en in 1987 woord de film     3 x 3 = Mazes Mina opgenaome en in 'n boemvolle Drakebôch vertoënd. Het 11-jeurig bestaon woord in 1989 gevierd mit ein optraeje van “Rowwen Hèze”. De oetwisselinge mit 't Franse Maulevrier ware zeer biezonjer in 't bestoan van de joekskapèl. Mit dealname aan de liedjesaovenjd, de optoch en boerebroelof leet Mazes Mina van zich huure tiedes 't carnevalsseizoen. Baovendeen is Mazes Mina de initiatiefnimmer van de Kiërsekermis, ein neet miër weg te dinke aktiviteit in Beesel.

inkele foto's van de kiersekermis >>    

Naeve de vuule hoëgtepunte kende Mazes Mina auch heur deeptepunte. D'r waare op 'n gegaeve moment te weinig leeje om nog nao boete te traeje. De bezitting waas te klein en euverwaoge woord te stoppe. D'r woord nog éin poging gedaon om leeje te vinje en ein nuuje bendeleider te zeuke. Gelukkig woorte inkele nieje leeje + ein nuuje dirigent (Geert Thurlings oet Zjwame) gevonje en Mazes Mina kos weer verder. Inmiddels steit d'r weer ein joekskepèl die weer aktief is en te zeen en te huuren is op de dweijlaovonjde, de liedjesaovenjd, tiedes de receptie van de (jeugd)prins en de inmiddels aafgesjafte boerenbroeloft. Mazes Mina is auch de organisator van de Boetegewoëne Beeselse Binnenzitting op carnavalszonjig in de Maashof.

   
^^ 3 foto's van de altied gezellige Boetegewoëne Beeselse Binnenzitting

 Uniek
Sinds janewari 1979 vinje de repetities plaats bie Sef Janissen, wao Mazes Mina op donderdigaovenjd vanaaf 21.00 oer de kroeg “euvernimp” van Sef, omdèt hae den zien waekelikse kaartaovenjd heeft. Het vertrouwen det Sef en Mazes Mina in mekaar hubbe is mede ein sjtimelans geweas, det v'r  altied hubbe kenne repeteren in goeje , mèr auch in minder goeje tieje. De wieze raod van Sef: “alles kump good, maar met de tiëd” haet mede biegedrage dèt Mazes Mina al 29 jaor besteit.